គ្រូបង្វឹកវ័យ ៦៥ឆ្នាំ បានថ្លែងថា យើងពិតជាលេងមិនល្អ លេងដោយមិនមានការប្រុងប្រយ័ត្នទាល់តែសោះ……..
គ្រូបង្វឹកក្រុមបាល់ទាត់អ៊ីតាលីលោក Luciano Spalletti បានលើកឡើងថា កីឡាករខ្លួនលេងដោយគ្មានការយកចិត្តទុកដាក់ ក្នុងជំនួបស្មើរក្រូអាត នៅជំនួបបិទពូល B ពានរង្វាន់ UEFA Euro 2024 កាលពីយប់មិញ។
ជាការពិត ក្នុងការប្រកួត ដែលបានធ្វើឡើងនាកីឡដ្ឋាន Red Bull Arena ក្រុមទាំង២មិនអាចរកគ្រាប់បាល់បានទេ នៅក្នុងវគ្គទី១។
លទ្ធផលនេះ បានធ្វើអោយក្រុមការពារតំណែងជើងឯកអ៊ីតាលី អាចបញ្ចប់ក្នុងចំណាត់ថ្នាក់លេខ២ក្នុងពូល B ដែលធ្វើអោយពួកគេមានកៅអីទៅកាន់វគ្គ១៦ក្រុមចុងក្រោយ។ បើទោះជាបានទៅលេងវគ្គបន្ត យ៉ាងណាក៏ដោយ ការលេងមិនសូវល្អប្រសើររបស់កូនក្រុមបានធ្វើអោយគ្រូបង្វឹកអ៊ីតាលី លោក Luciano Spalletti បង្ហាញពីភាពមិនពេញចិត្ត ។
នៅក្នុងវគ្គទី២ នាទី៥៤ Luka Modric មានឱកាសទាត់បាល់ពិន័យ ១១ម៉ែត្រ ដោយសារកីឡាករអ៊ីតាលី Davide Frattesi បានយកដៃទប់បាល់ក្នុងប្រអប់គ្រោះថ្នាក់។ ការទាត់បាល់ពិន័យ១១ម៉ែត្ររបស់ Luka Modric ត្រូវបានអ្នកចាំទីអ៊ីតាលី សង្គ្រោះបាន ប៉ុន្តែ យ៉ាងណាវិញ រំលងពីនោះតែ១នាទី កីឡាករវ័យ៣៨ឆ្នាំ នៅតែអាចស៊ុតបាល់បញ្ចូលទី ផ្តល់ការនាំមុខដល់ក្រុមក្រូអាតបានសម្រេច។ ទោះត្រូវបាននាំមុខមុនក៏ពិតមែន ប៉ុន្តែក្រុមអ៊ីតាលី នៅតែតស៊ូវាយសម្រុក រហូតអាចរកគ្រាប់បាល់តាមស្មើវិញ ដោយកីឡាករ Mattia Zaccagni ស៊ុតបញ្ចូលទីនៅនាទី ៩០+៨ ដែលលទ្ធផល ១-១ បានរក្សាដល់ចប់ការប្រកួត។
គ្រូបង្វឹកគាត់បានលើកឡើងថា“យើងពិតជាលេងមិនល្អ លេងដោយមិនមានការប្រុងប្រយ័ត្នទាល់តែសោះ។ កីឡាករមិនអាចគ្រប់គ្រងបាល់បាន យើងត្រូវរង់ចាំរហូតដល់ចុងម៉ោងទើបអាចរកគ្រាប់បាល់បានទាំងលំបាក។ នេះជារឿងគ្រោះថ្នាក់ណាស់ ហើយបើយើងលេងដោយគ្មានគុណភាពបែបនេះ ទោះលេងទម្រង់បែបណា ក៏មិនទទួលលទ្ធផលល្អដែរ។”
ងាកមកមើល ការប្រកួត១គូទៀតក្នុងពូលជាមួយគ្នាគឺ អេស្ប៉ាញឈ្នះ អាល់បានី ១-០។
ការឆ្លងកាត់៣ប្រកួតក្នុងពូល B គឺ អេស្ប៉ាញ មាន៩ពិន្ទុនៅកំពូលតារាង អ៊ីតាលីមាន៤ពិន្ទុ នៅលេខ២ ដែល២ក្រុមនេះទទួលបានកៅអីទៅកាន់វគ្គ១៦ក្រុមចុងក្រោយ។ ក្រូអាតនៅលេខ៣មាន២ពិន្ទុ រង់ចាំអ៊ុតមើលដោយមានសង្ឃឹមតិចតួចថា តើពួកគេអាចទទួលបានកៅអីជាក្រុមលេខ៣ល្អក្នុងពូលឬយ៉ាងណា ខណៈអាល់បានីមាន១ពិន្ទុ ត្រូវវិលទៅផ្ទះវិញ៕