ខេត្តកំពង់ស្ពឺកំពុងរីកចម្រើនផ្នែកអចលនទ្រព្យ បច្ចុប្បន្នគម្រោងធំៗ បានចាប់ផ្តើមបង្កើតឡើងស្ទើរមិនគួរឲ្យជឿសោះ
កំពង់ស្ពឺចម្ងាយ៤៨គីឡូម៉ែត្រពីរាជធានីភ្នំពេញ ខេត្តកំពង់ស្ពឺមានព្រំប្រទល់ ខាងកើតជាប់នឹងខេត្តកណ្តាល និងតាកែវ ខាងត្បូងជាប់នឹងខេត្តតាកែវ និងខេត្តកំពត ខាងលិចជាប់នឹងខេត្តព្រះសីហនុ ខាងជើងជាប់នឹងខេត្តកំពង់ឆ្នាំង និងខេត្តពោធិ៍សាត់។
កំពងស្ពឺជាខេត្តកណ្តាលនៃខេត្ត ដែលមានសក្តានុពលទេសចរណ៍ កំពត និងព្រះសីហនុ បានរីកមុខមាត់ជាលំដាប់នៅពេលបច្ចុប្បន្ននេះ ដោយសារមានអ្នកវិនិយោគគិនចិនច្រើន ហើយបានសម្លឹងមើលខេត្តកំពង់ស្ពឺ ដែលកំពុងតែមានការវិនិយោគមជ្ឈមណ្ឌលកម្សាន្តធំបំផុតលើពិភពលោកយើងនេះ។
ក្រុមហ៊ុនចំនួន៣មកពីប្រទេសស្វីស ហុងកុង និងប្រទេសសឹង្ហបូរី បានប្រមូលទិញដីជាច្រើនហិកតាសម្រាប់ផែនការវិនិយោគបង្កើតមណ្ឌលកម្សាន្តលំដាប់ពិភព ស្ថិតក្នុងតំបន់បឹងវល្លិប្រេង ដែលជាប់ព្រំប្រទល់រវាងស្រុកសំរោងទង នឹងស្រុកភ្នំស្រួច នៃខេត្តកំពង់ស្ពឺ។
គម្រោងខាងលើនេះ នឹងផ្តល់ផលប្រយោជន៍ដល់ប្រជាពលរដ្ឋនៅជុំវិញតំបន់ ដោយការ ផ្តល់ការងារបម្រើសេវាផ្សេងៗជាច្រើនកន្លែងក្នុងកំរៃឈ្នូលខ្ពស់គួរសម្យ។ ក្រៅពីគម្រោង ខាងលើនេះកំពង់ស្ពឺ នឹងមានអគារភ្លោះផងដែរ ដែលអគារភ្លោះនេះទី១ មានកម្ពស់៣២ជាន់ និងទី២ មានកម្ពស់៦៤ជាន់ ដោយមានផ្សារទំនើប អគារការិយាល័យ និងកន្លែងកម្សាន្តជាដើម។
គួរជម្រាបផងដែរថា ក្រុមហ៊ុនចិនចំនួន១២ នឹងមកវិនិយោគនៅក្នុងប្រទេសកម្ពុជា ដោយជ្រើសយកខេត្តកំពង់ស្ពឺ ធ្វើជាទីតាំងសម្រាប់បង្កើតជារោងចក្រ ដែលអាចបង្កើតការងារដល់កម្មករប្រមាណ១២ម៉ឺននាក់៕